Duqayn ka dhacday deegaanka Birta-dheer, Jubbada hoose
-
- Posted On 01-10-2016, 12:52PM
KISMAYO, Somalia- Wararka warsidaha Garowe Online ka helayo Gobolka Jubbada Hoose, ayaa sheegaya in Duqeyn dhanka Cirka ah xalay saqdii dhexe ka dhacday deegaan ku yaalla gobolkaasi.
Weerarkan oo ay fuliyeen diyaarado Ajnabi ah ayaa lala bartilmaameedsaday saldhiyo ururka Al Shabaab ku leeyahay deegaanka Birta-dheer, oo ku dhawaad 60KM dhanka Galbeed uga beegan magaalada Kismaayo ee xarunta maamulka Jubbaland.
Ilo Wareedyo ku sugan deegaanka Birta-dheer, ayaa Garowe Online u sheegay inay xalay ku baraarugeen weeraray cirka ah oo ka socoto deegaanka, gaar ahaan goobo la sheegay inay ku suganyihiin Al Shabaab.
Mallayshiyaadka Al Shabaab ayaa dhankooda ka jawaabtay weerarkaasi iyagoo riday Hub Culus.
Khasaaro kala duwan ayaa ka dhashay howlgalkaas, waxaana la sheegay in kooxdii la weeraray laga dilay tiro mallayshiyaad ah.
Ciidamo katirsan dowladda Somalia, gaar ahaan kuwa sida gaarka ah u tababaran ayaa qayb ka ahaa duqayntaas oo la sheegay inay gaysteen diyaaradaha Maraykanku oo muddooyinkii dambe weeraro joogto ah ka waday gobolka Jubbada hoose.
Shabaab ayaa ku xooggan gobolka, waxaana arrintan kusoo aaday xilli maamulka Jubbaland wadan howlgal ka dhan ah Al Shabaab.
Majirto wax war ah oo kasoo baxay dhinaca maamulka Jubbaland iyo kooxda la weeraray ee Al Shabaab.
Khamiistii tagtey, Ciidamo Mareykanka ah ayaa weeraray deegaanka Golashombi, ee galbeedka Kismaayo.
GAROWEONLINE
