Ergooyinka Shirka Jowhar oo loo qeybiyay Dastuurka iyo Dhaliilo soo baxay
-
- Posted On 03-10-2016, 05:49PM
JOWHAR, Somalia- Wasaarada Arrimaha Gudaha iyo Federaalka Somalia ayaa Odayaasha Shirka Jowhar u qeybisay Nuqullo kamid ah Dastuurka uu yeelan doono Maamulka ay u dhisayaan dadka ku dhaqan Hiiraan iyo Shabeellaha Dhexe.
Odayaasha ayaa la siisay Fursad dhowr Maalmood ah inay kusoo aqriyaan Dastuurka, si loo guda galo ka doodista Dastuurka Maamulka cusub, iyadoo lagu xisaabtamayo Watiga iyo Howlaha kale ee yaalla.
Ergooyinka ayaa la filayaa inay guda galaana dhawaan ansixinta Dastuurka, Magaca maamulka Cusub iyo Calanka uu yeelan doono, waxaana arrimahassi ka shaqeynaya Wasaarada Arrimaha Gudaha iyo urur goboleedka IGAD.
Dhanka kale, Warar uu Warsidaha Garowe Online ka helayo Jowhar ayaa sheegaya inay jiraan Dhaliilo ay Odayaasha u jeediyeen dowladda Federaalka Somalia, waxaana Odayaasha Dhaqanka ay sheegeen in Dastuurka loo qeybiyay ay ku jiraan Qodobo aan ka tarjumaynin Danaha Gobolada maamulka loo samaynayo.
Shirka Jowhar oo galay Wajiga Labaad ayaa waxaa hareeyay Khilaafaad ku saabsan awood qeybsiga iyo Hanaanka Maamulka loo dhisayo, oo Odayaashu tilmaameen in aan loo madaxbanayn Go'aanka Shirka.
Sidoo kale, Wararku waxay xusayaan in Heshiis is-afgarad ah gaareen Wafdiga uu hogamainayo Ra'iisul Wasaare ku xigeenka Xukuumada Waqtiga ka dhamaaday ee Somalia Maxamed Cumar Carte iyo Ugaas Xasan Ugaas Khaliif.
Labada dhinac ayaa ku heshiiyay Labo Qodob oo kale ah;
- In si degdeg ah loo bilaabo Wadahadal leysugu soo dhaweeynayo kala aragti duwanaanta jirta
- In Xukuumada Waqtigeedu dhamaaday xaliso caqabadha siyaasadeed ee hortaagan geedi socodka dhismaha maamulka labada gobol.
Ugaas Xasan Ugaas Khilaaf ayaa tan iyo markii la caleemo saaray wuxuu si aad ah uga soo horjeeday inuu qeyb ka noqdo Hanaanka Maamul u samaynta Hiiraan iyo Shabeellaha Dhexe ee ka socdo Jowhar.
Xukuumadda waqtigu ka dhammaaday ayaa dadaal ugu jirta qaabkii dhaqso loogu dhisi lahaa maamulkan cusub si uu qayb uga noqdo doorashada waddanka ka dhici doonta dabayaaqada 2016.
GAROWEONLINE
