Fahfaahin kasoo baxaysa weerarka Baar-Sanguuni [Khasaaraha oo kordhay]
-
Wariyaha Muqdisho GAROWE ONLINE
- Posted On 19-01-2019, 11:43AM
KISMAYO, Somalia - Warar dheeraad ah ayaa kasoo baxaya khasaaraha dhimashada ee weerarkii saaka ka dhacay saldhiga military ee ku yaalla degaanka Baar-Sanguuni, ee duleedka magaalada Kismaayo.
Sarkaal katirsan ciidamada Jubbaland ayaa Warsidaha Garowe Online u xaqiijiyay in 73 xubnood oo katirsanaa Al Shabaab lagu dilay duqeyn cirka ah, oo ka dhacday Muuse Xaaji iyo Araare, kadib markii la fashiliyay weerarka Baar-Sanguuni.
Wararka qaar ayaa sheegaya in tirada dhimashada Al Shabaab ay gaareyso 64.
Duqeynta oo loo maleynayo inay fuliyeen diyaaradaha dagaalka ciidamada Mareykanaka ayaa lala eegtay Kolonyo gaadiid ah oo ay wateen dagaalyanada Al-Shabaab, sida ay sheegeen illo ku sugan degaanka.
Weerarka hore ee ka dhacay Baar-Sanguuni ayaa waxaa lagu dilay 4 Askari, iyadoo saraakiisha Jubbaland ay sheegeen in laga hortagay duulaanka, sidoo kalena la qabtey gaari laga soo buuxiyay walxo qarxa. [Halkan ka akhri warka]
"Ciidamada ayaa helay xogta weerarka, taasoo u sahashay inay kahor-tagaan, lana qabto gaarigii lala damacsanaa in lagu qarxiyo saldhigga," ayuu yiri Sarkaal military oo codsaday in magaciisa la haabin,.
Saldhigga Baar-Sanguuni oo ay wada degan yihiin Ciidamo Soomaali ah iyo kuwa Mareykanka ayaa la weeraray June, 2018, kaasoo lagu dilay 1 skari oo American ah, iyadoo afar kale lagu dhaawacay.
GAROWE ONLINE
