Farmaajo oo kormeeray Xeryo Military xilli ciidanka kasoo baxayaan aagaga difaaca

MUQDISHO, Soomaaliya - Madaxweynaha Soomaaliya, Maxamed Cabdullaahi Farmaajo ayaa maanta kormeer ku tagey dhowr xero ciidan oo ku yaalla magaaladda Muqdisho.

Farmaajo oo ay wehlinayeen Taliyaha ciidamada xoogga, saraakiil ciidan iyo mas'uuliyiin kale oo wasaaradda difaaca katirsan ayaa tagey saldhigyada Jeneraal Gordan, Dhaga-badan iyo Wasaradda Gaashaandhigga.

Madaxweynaha ayaa kulamo la qaatey saraakiisha ciidamada iyo cutubyo katirsan ciidamada xoogga dalka, oo uu kala hadlay arrimo dhowr oo ku saabsan dagaalka ka dhanka ah Al-Shabaab iyo xoreynta degaanada ka maqan gacanta dowladda.

Farmaajo ayaa intii uu ku gudaha jiray kormeerkiisa loo xiray wadooyinka waaweyn ee Muqdisho, iyadoo saacado hakad la geliyay isku socodka gaadiidka iyo shacabka, iyadoo jidadka la dhigay ciidamada koofi-gaduudka loo yaqaano.

Madaxweynaha ayaa u muuqda mid kusoo baxay cabashada iyo gadoodka ciidamada Militeriga, oo qaarkood kasoo bxaya aagaga difaaca ee gobollada Shabeellooyinka, kadib markii ay waayeen mushaarkooda iyo raashiinka mudo 4 bilood ah.

Ciidamada dowladda Federaalka ee ku sugan degmada Baraawe, ee gobolka Shabeellaha Hoose ayaa shalay u qabtey mudo 48 saacadood Madaxweynaha inuu uga soo jawaabo cabashadooda mushaar la'aanta. [Halkan ka akhri warka].

GAROWE ONLINE