Farmaajo oo laga yaabo inuu Itoobiya kula kulmo Madaxweynaha Somaliland

MUQDISHO, Soomaaliya - Warar hoose oo uu helayo Warsidaha Garowe Online ayaa sheegaya in Madaxweyne Farmaajo oo hadda ku sugan Jabuuti uu safar ku tagayo Itoobiya, halkaasi oo kaga sii horeeyo Madaxweynaha Somaliland.

Illo Xog-ogaal ah oo ku dhaw Xafiiska Madaxweynaha ayaa u sheegay GO in Farmaajo laga yaabo inuu Addis Ababa kula kulmo Muuse Biixi Cabdi, iyadoo Ra'iisul Wasaaraha Itoobiya, Abiy Axmed uu dhex-dhexaadinayo.

Dowladda Federaalka ayaa mabda'ahaan ogolaatey kulanka, balse waxaa la sheegay in aan la isku afgaran, oo go'aan laga gaarin qaab uu u dhacayo, Goobta iyo kaalinta dalalka dhex-dhexaadinaya.

Wali ma jirto war rasmi ah oo kasoo baxay Villa Soomaaliya oo ku saabsan kulanka Addis Ababa iyo socdaalka la sheegay inuu Madaxweynaha ku tagayo dalka Itoobiya.

Madaxweyne Farmaajo iyo Muuse Biixi ayaa sanadkii tagey la qorsheeyay inay Jabuuti ku kulmaan, balse baaqday kadib markii Somaliland kala wareegtay Puntland degaanka Tukaraq ee gobolk Sool, January 2018.

Turkiga ayaa dhawaan shaaciyay inuu dhex-dhexaadinyo Somaliland iyo dowladda Federaalka ah ee Soomaaliya, waxuuna u qeybsane arrimahan ugu magacaabey safiirkii hore ee Ankara u fadhiyay Muqdisho, Olgan Bekar.

GAROWE ONLINE