Farmaajo oo Warqadaha Aqoonsiga ka gudoomay Safiirka cusub ee Ethiopia [Sawirro]
-
- Posted On 30-04-2017, 07:52PM
MUQDISHU, Somalia - Maxamed Cabdullahi Farmaajo Madaxweynaha Somalia ayaa maanta waraaqaha aqoonsiga ka guddoomay Safiirka cusub ee Itoobiya Amb. Jamaaludiin Mustafa Omar, ka hor booqashada Madaxweynaha lagu wado in Todobaadkan ku tago dalka Itoobiya.
Madaxweyne Farmaajo ayaa Madaxtooyada ku qaabilay Safiirka Itoobiya Amb. Jamaaludiin oo bishii hore xukuumadda Addis ababa usoo magacowday Wakiilka gaarka ah ee u jooga Somalia.
Danjire Jamaaludiin Mustafa Omar ayaa ugu horeyn madaxweynaha u gudbiyay nuqulo ka mid ah waraaqdiisa danjirnimo iyo dhambaal uu ka sido Madaxweynaha dowladda Itoobiya Mulatu Teshome.
Madaxweyne Farmaajo ayaa ku soo dhoweeyay xafiiskiisa Danjiraha cusub ee Itoobiya Amb. Jamaaludiin, oo ah nin asalkiisu yahay Soomaali, kana soo jeeda deegaanka Ismaamulka Soomaalida Itoobiya.
Qaabilaada Madaxweynaha oo aheyd mid hab maamuus leh oo la mida ah midda diblomaasiyadda Caalamiga ah, ayaa waxaa la is dhinac dhigay Calamada Itoobiya iyo Soomaaliya, xilliga Madaxweynuhu guddoomay waraaqaha aqoonsiga.
Shalay ayay aheyd markii Wasiirka Arrimaha Dibadda Soomaaliya Yuusuf Garaad Cumar oo nuqul ka mid ah waraaqaha aqoonsiga Danjirnimo uu ka guddoomay Danjire Jamaaludiin Mustafa Cumar.
Madaxweyne Farmaajo ayaa la filayaa in Arbacada soo socota uu booqasho rasmi ah ku tago magaalada Addis Ababa ee dalka Itoobiya, halkaasoo uu ku joogi doono booqasho qaadan doonto labo cisho.
GAROWEONLINE
