Fartaag oo is-casilay xilli lagu eedeeyay inuu taageeray murashax
-
- Posted On 01-02-2017, 07:23PM
MUQDISHU, Somalia- Xildhibaan Cabdullaahi Sheekh Ismaaciil Fartaag ayaa iska casilay xilka Guddoomiye ku xigeenka Guddiga doorashada Madaxweynaha, xilli 8-da February ay dhacayso Doorashada.
Senator Fartaag, ayaa warqaddiisa is casilaadda u gudbiyay gudoonka Guddiga Doorashada Somalia, iyadoo is-casilaadiisa u sababeeyay inuu yahay shaqsi taageersan Xasan Sheekh.
Fartaag ayaa shaqadan iska wareejiyay markii lagu eedeeyay inuu kamid yahay Xildhibaanada taageersan Madaxweyne Xasan Sheekh Maxa'uud, oo kamid ah 24-ka Murashax ee u taagan Xilka Madaxweynaha Somalia.
Taageeradiisa ayaa soo if-baxday markii uu ka qayb galay kulan casho ah oo mudane Xasan u sameeyay Xildhibaano katirsan labada aqal ee Barlamanka Somalia.
Generalkan mar soo noqday Madaxweyne ku-xigeenka Galmudug ayaa qorshihiisan ku tilmaamay inuu salka ku hayo inaan laga shakin Guddiga doorashada.
Gudiga Doorashada Madaxweynaha ayaan wali ka hadal Is-casilaadda Fartaag.
Waxaa jira wal-wal laga qabo in la musuq-maasuqo doorashada Madaxweynaha Somalia oo markii u horaysay u codayn doonaan Xildhibaano kamid ah labada Aqal ee Barlamanka Federaalka Somalia.
GAROWEONLINE
