Galmudug “Diyaar ayaan u nahay inaan la hishiino Ahlu-Sunna”
-
- Posted On 04-04-2017, 11:08AM
CADAADO, Somalia- War kasoo baxay golaha xukuumadda Galmudug ayaa looga hadlay arrimo ku saabsan dib u hishiisiinta iyaga iyo Ahlu Sunna oo katalisa qaar kamid ah gobollada dhexe.
Wasiirka Wasaaradda Dastuurka iyo dib u heshiisiinta Galmudug Cismaan Maxamed Cali Socdaal, ayaa sheegay in ay soo dhaweynayaan maamulka Ahlusunna ,islamarkaana diyaar u yihiin inay la heshiiyaan.
Balse, wuxuu diiday in meel hoose laga soo bilaabo dhismaha Galmudug, maadama Ahlu Sunna diidantahay qaabka markii hore wax loo qaybiyay.
Socdaal, ayaa ku baaqay inay ogolyihiin wada-hadal ay ka galaan arrimaha mugdigu ku jiro islamarkaana laga qanciyo walaalahooda gobollada dhexe.
Dowladda Federaalka Somalia, ayuu ugu baaqay inay ka fiirsato arrimaha masiiriga ah ee Galmudug.
Xildhibaanada aqalka sare maamulkaas ugu matala gobollada dhexe ayuu sheegay in looga baahanyahay sidii ay meel u saari lahaayeen matalaadda xukuumadda iyo shacabkooda.
Hadalkan ayaa kusoo aaday xilli magalada Cadaado ay kasocoto qaban qaabada doorashada Madaxweynaha oo la filayo inay dhawacdo dhawaan, kadib markii dib loo dhigay bishii hore.
Maamulka Ahlu Sunna ayaa gacanta ku haya caasumadda Galmudug ee Dhuusa Mareeb.
Dhawaan Madaxweynaha Ahlu Sunna Sheekh Shaakir ayaa tagay magaalada Muqdishu kadib markii uu casuumad ka helay dowladda Federaalka.
Ahlu Sunna ayaa aad u mucaarad sanayd dowladdii hogaaminayay Xasan Sheekh iyagoo ku dhaliilayay inaysan ula dhaqmin sidii maamul ka jira Somalia, waxayna diideen shirar iyo arrimo ay garwadeen ka ahayd wasaaraddii arrimaha gudaha waqtigaas.
GAROWEONLINE
