Ganacsade ku deeqay markab lagu soo qaadayo qaxootiga Yemen
-
- Posted On 25-05-2015, 01:42PM
May 25, 2015 (GO)- Ganacsade Soomaali ah ayaa ku deeqay markab loogu talo galay inuu soo daad gureeyo qaxootiga Soomaalida ee ku xanniban dagaallada ka socda dalka Yemen.
Cabdi Cali oo ah mulkiilaha shirkad kireysa maraakiibta xammuulka ayaa sheegay in markii uu arkey dhibka haysta qaxootiga uu go'aan ku gaarey inuu ka qayb qaato gurmadka.
"waxan go'aansadey maadaama aan kamid ahayd ganacsatada Soomaalida ee maraakiibta leh inaan diro markabkii ugu horreeyey oo aan albaabka u furo dadka khayrka jecel" ayuu yiri.
Dowladda Federaalka oo sheegtay inay maraakiib soo qaada qaxootiga u diri doonto Yemen ayaan ilaa iyo hadda wax tallaabo ah qaadin.
Shalay ayey ahayd markii maamulka Somaliland sheegtay inaysan hadda kadib qaabili doonin qaxootiga ka imaanaya Yemen, arrintaasoo caqabad ku noqon doonta maareynta qaxootiga maadaama culeyskoodu usoo weecan doono dhanka Bosaso.
Dadweynaha Puntland ayaa isu xil qaamey sidii ay ugu gurman lahaayeen walaalahooda soo qaxay, waxaana xusid mudan in laga soo bilaabo bishii April ay dadweynaha Puntland ku deeqeen lacag kor u dhaafeysa boqol iyo konton kun oo doollar.
GAROWE ONLINE
