Guddiga doorashooyinka oo diiday Natiijada wasiir la doortay
-
- Posted On 11-12-2016, 02:08PM
MUQDISHU, Somalia- Guddiga doorashooyinka heer Federaal, ayaa soo saaray qoraal ay kaga hadlayaan, wasiir si sharci darro ah loogu doortay magaalada Jowhar ee xarunta Hir-Shabeelle, kaasoo horay looga joojiyay inuu kamid noqdo ragga u tartamaya kursiga beesha Jidle.
Wasiirkii hore dhalinyarada iyo Cayaaraha Somalia, Maxamed Cabdullaahi Xasan Nuux, oo lagu eedaynayay inuu ka dambeeyay fowdo dabayaaqadii bishii hore ka dhacday goobta lagusoo xulo xubnaha Aqalka hoose ku yeeshay maamulkaas, ayaa laga reebay tartanka.
Balse, Guddiga doorashooyinka ee maamulka Hir-Shabeelle, ayaa shalay u qabtay doorasho qarsoodi ah oo xilli hore subaxnimadii Sabtida la qabtay isagoo kusoo baxay cod Aqlabiyad leh.
Tallaabadaas, ayaa keentay in guddi doorashooyinka heer Federaal mar kale soo saaraan go'aan lagu naqdinayo natiijadaas, waxaana Wabarka beesha Jidle lagu amray inuu soo xulo Ergo cusub iyadoo gabi ahaanba la mamnuucay in mas'uulkaasi tartan u galo Kursiga beeshaasi.
Doorashada Aqalka hoose ee kasocota xarumaha maamul goboleedyada Somalia, ayaa waxaa hareeyay musuq-maasuq iyo fowdo iyadoo kiisas kala duwan ka dhaceen magaalooyinka Cadaado iyo Jowhar.
GAROWEONLINE
