Hir-Shabeelle: Qof dumar ah oo kusoo baxday kursiga 31-aad
-
- Posted On 03-12-2016, 06:05PM
JOWHAR, Somalia- Doorashada Aqalka hoose ee maamulka Hir-Shabelle ayaa waxaa maanta kusoo baxday Faadumo Faarax Ibraahim, oo wareegga labaad uga adkaatay Nadiifo Maxa'ed, oo ah Xildhibaan kamid ah Baarlamaanka uu waqtiga ka dhamaadey iyo Wasiir hore.
Kursiga oo ahaa mid u gaar ah Haweenka, ayaa waxaa u tartamay 4 Musharax, waxaana Gudiga Doorashadu Hir-Shabelle shaaciyay inay Faadumo Faarax ku guulkaystay kadib markii ay heshay 37 cod.
Nadiifo Maxa'ed oo ku hartay Wareegga Labaad ayaa heshay 14 Cod.
Faadumo Faarax ayaa ku guulaysatay Kursigii 31-aad oo kamid 37 Kursi oo Maamulka Hir-Shabeelle u matali doono Baarlamaanka Federaalka ee Soomaaliya, waxaana u haray maamulkaasi 6 Kursi oo kaliya.
Doorashada Aqalka hoose ayaa sidoo kale ka dhacaysa Magaalada Baydhobo, ee xarunta KMG ah ee Koonfur Galbeed, taasi oo maraysa Heer Gabo-gabo, kadib markii la doortay inta badan Kuraasta.
Kuraasta Baarlamaanka soo socdo ayaa noqday kuwii ugu qaalisanaa Taariikhda Somalia, kadib markii Kuraas lagu iibsaday lacag dhan 1.3 Million oo Dollar Doorashooyin ka dhacday Jowhar iyo Cadaado.
Musuq-maasuqa Doorashada ayaa gaarey heerkii ugu sareeyay, waxaana taasi ay keentay in Beesha Caalamka iyo QM ay Rajo xumo ka muujiyaan Hanaanka Doorashada Aqalka hoose ee Baarlamaanka.
GAROWEONLINE
