Hoobiyaal lagu garaacey agagaarka garoonka diyaaradaha Muqdishu
-
- Posted On 16-04-2017, 08:51PM
MUQDISHU, Somalia - Tiro hoobiyaal ah ayaa waxay ku dhaceen saaka nawaaxiga Garoonka Diyaaradaha Aadan Cadde ee magaalada Muqdishu, kuwaasi oo geestay khasaarooyin kala duwan.
Hoobiyaasha oo gaareyay 4 ayaa lagu garaacay Xaafadda Danwadaagta ee degmada Wadajir, oo wax ka yar 200 Mitir u jira Garoonka Diyaaradaha, waxaana la xaqiijiyay inuu ku dhaawacmay ugu yaraan 1 qof.
Ciidamada NISA ayaa ku guulaystay inay dileen labo kamid ah kuwa weerarka geestay, iyadoo sidoo kale ay gacanta ku dhigeen Gaariga laga riday Hoobiyaha, oo ah nooca raaxada ee loo yaqaano CARIB-ka.
Gaariga oo ay saarnaayeen walxaha qarxa ayaa daqiiqado kadib qarxay, mana sababin khasaaro.
Afhayeenka mamaulka gobolka Banaadir Cabdifitaax Cumar Xalane, ayaa u sheegay warfidiyeenka in dagaalyahanada ay rasaas is-waydaarsadeen ciidamada amniga kahor inta aan la toogan.
Al shabaab ayaa sheegatay mas'uuliyada weerarka, oo noqonayo midkiii labaad oo mudo hal Todobaad ah ka fuliyaan nawaaxiga Garoonka diyaaradaha Muqdishu, oo si weyn amnigiisa loo ilaaliyo.
Weerarkii hore waxaa ku geeriyootay afar ruux oo shacab ahaa.
GAROWEONLINE
