Howlgal Lagu Beegsaday General Odowaa iyo Madaxda Mucaaradka oo ka hadlay

Muqdisho— Madasha Samatabixinta Soomaaliyeed ayaa hiil iyo qaylo xooggan ka muujisay, kana digtay cawaaqib xumo ka dhalan karta qorsheyaal ay sheegtay inay wadaan ciidanka amniga ee daacadda u ah Madaxweynaha mudo-xileedkiisu dhamaaday Xasan Sheekh Maxamuud.

Qorshahan oo ay xuseen inay ku lug leeyihiin xubno ka tirsan ciidanka xoogga dalka iyo sirdoonka, ayaa la sheegay in lagu beegsanayo Taliyihii hore ee Ciidanka Xoogga Dalka, General Odowaa Yuusuf Raage, guryo iyo hanti gaar loo leeyahay, iyo waliba shakhsiyaad caan ah oo ka tirsan mucaaradka Muqdisho.

Madasha ayaa si adag u cambaareysay weerar la sheegay in lagu qaaday hoyga Sheikh Cabdulqaadir Soomow, iyadoo ku eadeysay hoggaanka sare ee dowladda federaalka inay jabiyeen heshiisyadii iyo nidaamkii horey loogu heshiiyay ee ahaa in lagu qaboojiyo xiisadda siyaasadeed iyo tan ciidan ee ka taagan caasimadda.

Ugu dambayn, madasha ayaa baaq degdeg ah u dirtay ciidamada qalabka sida, iyadoo ka codsatay inay ka fogaadaan ku dhexmilanka arrimaha siyaasadda, ayna dhex-dhexaad u ahaadaan dhinacyada isku haya talada dalka.

Waxay kaloo uga digeen madaxtooyada dalka (Villa Somalia) in wixii dhibaato, xasillooni-darro, iyo hurinta colaad ah oo ka dhasha tallaabooyinkan ay mas'uuliyaddeeda iyagu qaadi doonaan.

GAROWE ONLINE