Idaacad ku taal Afgooye oo la xiray
-
- Posted On 03-10-2016, 07:04PM
AFGOOYE, Somalia- Maamulka degmada Afgooye ee gobolka Shabeellaha hoose, ayaa hawada ka saaray Idaacad ka howl gali jirtay degmadaas.
Ciidamo uu wato Gudoomiyaha Afgooye, ayaa lagusoo warmayaa inay tageen Idaacadda islamarkaana amar ku bixiyeen in la damiyo.
Cabdinaasir Caalim Ibraahim oo ah Guddoomiyaha degmadaas, ayaa Radiyowgan ku eedeeyay inay ka shaqayso isku dirka iyo amni xumada deegaanada hoos yimaada Afgooye.
Balse, arrintaas waxaa gaashaanka ku dhuftay Agaasimaha Radio Afgooye oo xusay inaysan jirin wax amni xumo keenaya oo laga baahiyay xarunta la xiray.
Wuxuu Agaasime Maxamed Muuse, dhaliilay qaabka loo maray xiritaanka Idaacadda, isagoo xusay inaan horay loo siin wax digniin ah islamarkaana ciidamo hubaysan oo aan wadan waaran Maxkamadeed albaabka isugu dhufteen xarunta.
Muuse, wuxuu ku eedeeyay xarigga Raadiyaha maamulka Koonfur Galbeed isagoo sheegay in ciidamadan ka amar qaataan xukuumadda Baydhabo.
Majirto qalab la qaatay iyo cid la xiray siday noo xaqiijiyeen maamulka Idaacadda, balse arrintan ayaa la sheegay inay dabo socoto dadaallo maamulka degmada Afgooye ee gobolka Shabeellaha hoose ku caburiyaan warbaahinta.
Idaacadda la xiray ayaa ah midda kaliya ee ka howl gasha gobolka, waana xarun gaar loo leeyahay iyagoo barnaamijyadeeda laga dhagaysto degmada afgooye iyo inta ku xeeran.
GAROWEONLINE
