Imaaraadka oo gaadiid gaashaaman siiyey booliska D. Federaalka
-
- Posted On 10-06-2015, 05:43PM
June 10, 2015 (GO)- Dowladda Imaaraadka Carabta ayaa gaadiid gaashaaman ugu deeqday booliska Dowladda Federaalka Soomaaliya.
Munaasabad qalabkan lagula kala wareegayey oo ka dhacday gudaha dekedda magaalada Muqdisho ayaa waxaa kasoo qayb galay Wasiirka Amniga Gudaha Cabdirasaaq Cumar Maxamed, Safiirka Imaaraadka ee Somalia Muxamed Cuthmaan iyo Taliyaha Booliska Maxamed Sheekh Xasan.
Wasiirka Amniga oo ugu horreyn goobta ka hadlay ayaa uga mahadceliyey Dowladda Imaaraadka Carabta taageerada joogtada ah ee ay siiso Soomaaliya.
Taliyaha Booliska oo isna hadlay ayaa sheegay in gaadiidkani qayb weyn ka qaadan doono tayeynta iyo horumarinta shaqada booliska.
Safiirka Imaaraadka wuxuu sheegay in Dowladda Imaaraadku sii joogteyn doonto taageerada ay siiso Soomaaliya, gaar ahaan kaalinta ay ka qaadaneyso dib u dhiska iyo qalabeynta ciidamada Soomaaliya.
Dowladda Imaaraadka ayaa todobaadyo kahor sidan oo kale gaadiid gaashaaman u siisey ciidamada Jubaland iyo Puntland, inkastoo gaadiidkaasi ahaa mid aad u tiro yar marka loo babar dhigo inta la siiyey Dowladda Federaalka.
GAROWE ONLINE
