Jawaari oo ku wajahan Jowhar iyo Xildhibaano la dhaarinayo
-
- Posted On 09-10-2016, 10:51AM
JOWHAR, Somalia- Gudoomiyaha Baarlamaanka Federalka Somalia ee waqtigiisu dhammaaday Maxamed Sheekh Cusmaan Jawaari, ayaa lagu wadaa inuu maanta gaaro magaalada Jowhar ee xarunta gobolka Shabeellaha dhexe, haalkaas oo kasocdo shirka maamulka cusub ee loogu magac daray Hir-Shabeelle.
Wararka Warsidaha GO helayo ayaa sheegaya in Gudoomiye Jawaari ka qeybgalayo dhaarinta Xildhibaanada Hir-Shabeelle, oo ka dhacaysa Hoolka Shirka uu ka socdo ee magaalada Jowhar, halkaas oo maalintii shalay ahayd lagu xareeyay Xildhibaanada maamulkan.
Dhaarinta Xildhibaanada oo maanta dhici doonta, ayaan wali lahayn tiradooda rasmiga ah, balse waxaa jira khilaaf iyo Mudanayaal aan wali lasoo gudbin.
Wararku waxay sheegayaan in hadda ay diyaaryihiin oo kaliya 45 Xildhibaan.
Sida ay xusayso xog hordhaca ah ee soo gaartay GO, Baarlamaanka Hir-Shabeelle wuxuu ka koobnaan doonaa 91 mudane, waxaana suurtagal ah inuu ka yaraado ama ka badnaado, sababtoo ah Beelo qaar ayaa ka baxay Shirka.
Marka la gaaro 15-ka Bishan October, Xildhibaanada Hir-Shabeelle waxay dooran doonaan Madaxweynaha Maamulkaasi, taasi oo soo afjari doonta Shirka socday mudada ku dhaw halka sano.
GAROWEONLINE
