Jubaland oo ka digtay hubanti la’aan siyaasadeed iyo faragelin shisheeye

KISMAAYO – Maamulka Jubaland ayaa ka digay xaalad hubanti la’aan siyaasadeed oo ka dhalan karta dhammaadka muddo-xileedyada hay’adaha dowladda federaalka, iyagoo muujiyey walaac ku aaddan saameynta ay arrintan ku yeelan karto xasilloonida dalka.

War-saxaafadeed kasoo baxay Jubaland ayaa lagu sheegay in isbeddel kasta oo ku yimaada hannaanka siyaasadeed uu sababi karo jahawareer haddii aan loo marin waddo sharciyeysan oo cad.

Sidoo kale, maamulka ayaa si adag uga digay faragelin kasta oo ay sameeyaan dowlado shisheeye, iyagoo xusay in tallaabooyinka noocaas ah ay dhaawici karaan madaxbannaanida siyaasadeed iyo go’aan qaadashada gudaha ee Soomaaliya.

“Waxaan ku baaqeynaa in xal kasta oo la raadinayo uu noqdo mid ku dhisan sharciga iyo wadatashi dhab ah oo dhex mara dhammaan dhinacyada ay khuseyso,” ayaa lagu yiri war-saxaafadeedka.

Ugu dambeyn, Jubaland waxay ugu baaqday madaxda siyaasadda dalka in ay mudnaanta siiyaan ilaalinta midnimada iyo xasilloonida, iyagoo ka fogaanaya tallaabo kasta oo horseedi karta qalalaase siyaasadeed.

GAROWE ONLINE