Kolonyo katirsan ciidanka kenya oo lagu weeraray Gedo
-
- Posted On 02-11-2016, 08:31PM
CEEL-WAAQ, Somalia- Ugu yaraan 2 Askari oo katirsan ciidamada Kenya, ayaa ku dhimatay, 4 kalena dhaawac ayaa kasoo gaarey Qarax maanta oo Arbaco ah ka dhacay deegaan ku dhaw degmada Ceel-Waaq, ee gobolka Gedo.
Ilo wareedyo ku sugan Ceel Waaq, ayaa u sheegay Warsidaha GO in Kolonyo ay wateen ciidamada Kenya, ee qeybta ka ah AMISOM weerar qarax ah lagula eegtay deegaanka Burta-Mangete.
Weerarka ayaa dhacay xili ay ciidamadan Sahay military u wadeen saldhigyadooda ku yaalla deegaanka Buzaar, oo ku dhaw xadka kala qeybiya wadamada Soomaaliya iyo Kenya.
Ciidamada Kenya ayaa la sheegay in Qaraxa sidoo kale uga burburay mid kamid ah baabuurtii ay wateen, waxayna goobta ka qaateen askarta looga dhaawacey oo gaaraya ilaa 4 kuwaasi oo gudaha Kenya loo gudbiyay.
Ma jirto wax war ah oo kasoo baxay Saraakiisha ciidanka Kenya oo ku aadan weerarka ka dhacay duleedka degmada Ceel-Waaq, kaasi oo mas'uuliyadiisa sheegatay Kooxda Al shabaab.
Al shabaab ayaa inta badan weeraro jidgal ah iyo qaraxyo isugu jira kula eegta gobolka Gedo ciidamada ka socda dalka Kenya, ee ku jooga dalka magaca howlgalka Midowga Afrika iyo kuwa dowladda Soomaaiya.
GAROWEONLINE
