Koonfur Galbeed oo Mas'uuliyiin katirsan DFS ku Eedeysay inay Xiriir la leeyihiin Al-Shabaab

BAYDHABO — Maamulka Koonfur Galbeed ayaa eedaymo culus u jeediyey mas’uuliyiin ka tirsan Dawladda Soomaaliya, iyagoo ku eedeeyey inay xiriir la leeyihiin Al-Shabaab isla markaana ay hubaynayaan maleeshiyaad ka hawlgala deegaanno ka tirsan gobolka Baay.

Arrintan ayaa sii xoojisay xiisadda siyaasadeed ee u dhexeysa Baydhabo iyo Muqdisho.

Mas’uuliyiinta Koonfur Galbeed ayaa sheegay in wasiirro iyo xildhibaanno federaal ah ay ku lug leeyihiin abaabulka iyo qalabaynta kooxo hubeysan oo ka dhaqdhaqaaqa degmada Buurhakaba. Wasiirka Amniga maamulkaas, Xasan Cabdiqaadir, ayaa warbaahinta u sheegay in ciidamada lagu arkay halkaas aysan ka tirsanayn ciidamada rasmiga ah ee dawladda, balse ay yihiin maleeshiyaad gaar loo abaabulay.

Wuxuu sheegay in dhaqdhaqaaqyadaasi ay khatar ku yihiin amniga gobolka, isagoo xusay in qaab-dhismeedka iyo xeeladaha ay adeegsadaan ay u egyihiin kuwa kooxaha xagjirka ah. Dowladda Federaalka weli kama soo saarin wax jawaab rasmi ah oo ku aaddan eedaymahan.

Xiisadda ayaa sii korortay kadib markii maamulka Koonfur Galbeed uu ku dhawaaqay joojinta wada-shaqeyntii kala dhaxeysay Muqdisho. Hoggaanka gobolka ayaa ku eedeeyey dowladda federaalka inay faragelin ku hayso arrimahooda gudaha isla markaana ay wado dadaallo lagu wiiqayo maamulka uu hoggaamiyo Madaxweyne Cabdicasiis Xasan Maxamed (Laftagareen).

Dhanka kale, Qaybta 60-aad ee Ciidanka Xoogga Dalka Soomaaliyeed, oo saldhiggeedu yahay Baydhabo, ayaa la sheegay inay muujisay taageero ay u hayso mowqifka maamulka Koonfur Galbeed. Muuqaallo lagu faafiyey baraha bulshada ayaa muujinaya saraakiil iyo askar si cad u garab istaagaya hoggaanka gobolka.

Khilaafkan ayaa ku soo beegmaya xilli ay taagan tahay dood adag oo ku saabsan wax ka beddelka dastuurka iyo hannaanka doorashooyinka dalka. Koonfur Galbeed waxay ku biirtay maamullada Puntland iyo Jubbaland oo horay u jaray xiriirka ay la lahaayeen dowladda dhexe, taas oo muujinaysa caqabado sii kordhaya oo wajahaya nidaamka federaalka ee Soomaaliya.

GAROWE ONLINE