Macalimiin Dugsi Qur’aan oo lagu dilay Shabeellaha Dhexe

MUQDISHO, Soomaaliya - Koox hubeysan, oo aan heebtooda la aqoon ayaa saakay ku dilay 5 Macalin Dugsi Qur'aan Tuulada Burdheera ama Koogaar oo qiyaastii 50-KM u jirta degmada Cadalle ee gobolka Shabeellaha Dhexe.

Saraakiisha amniga gobolka ayaa sheegay in dableyda rasaas ooda uga qaadeen Macalimiinta xili ay qur'aan saarayeen hooyo xanuunsan kadibna goobta isaga baxsaday, iyadoo labo kamida Macalimiinta ay walaalo ahaayeen.

Magacyada Macalimiinta ayaa lagu kala sheegay Sheekh Daahir Xasan Cali Dheere, Macalin Maxamuud Canbuure, Macalin Maxamed Xuseen Axmed Cadaawe, Macalin Muqtaar Cabdullaahi Cilmi iyo Ow Muxumud Xasan Cali Dheere.

Lama oga cida ka dambeysa dilka argagaxa leh, laakiin waxay mas'uuliyiinta gobolka sheegeen in uu socdo baaritaan, iyadoo wararka kale ay sheegayaan in falka uu la xiriiro aano qabiil, oo degaanada xeebta ku yaalla ka taagnaa mudooyinkii dambe.

GAROWE ONLINE