MD Farmaajo oo soo farageliyay Mooshinka laga keenay Xoosh
-
- Posted On 03-08-2017, 11:24AM
MUQDISHU, Somalia - Madaxda sare ee dowladda Federaalka Somalia ayaa si deg deg ah usoo farageliyay Mooshinka ay Xildhibaano katirsan Baarlamaanka ka keeneen Wasiirka Dastuurka Cabdiraxmaan Xoosh Jibriil.
Illo-wareedo ku sugan Villa Somalia, ayaa u sheegay Warsidaha Garowe Online in Madaxweyne Farmaajo uu xalay Xafiiskiisa kula kulmay Xildhibaanada mooshinka kasoo gudbiyay Wasiir Xoosh.
Intii uu socday Kulanka, Madaxweynaha ayaa kala hadlay Mudaniyaasha Baarlamaanka sidii looga takhalusi lahaa Mooshinka, la doonayo in Xasaanada looga qaadi Wasiirka Dastuurka dowladda Somalia.
Wararka aan helaynay, ayaa sheegaya in Xildhibaanada ay ka biyo diideen Madaxweynaha dhex-dhexaadinta, islamarkaana aysan dib ugu laabaneyn go'aankooda ah inay la xisaabtamaan Wasiirka.
Khilaafka iyo Xiisadda u dhaxeeya Wasiir Xoosh iyo Xildhibaanada ayaa cirka isku shareeray, markii ay Gollaha Shacabka laaleen amarkii Maxkamada sare ee so baxay bishii May, kaasi oo ahaa in dib loogu laabto doorashada kuraasta 8 Mudane, oo lagu muransan yahay.
Wasiir Xoosh ayaa sharci darro ku tilmaamay go'aanka Baarlamaanka uu ku baabi'iyay Amarka Maxkamadda sare, isagoo qoroollo xanaf leh soo geliyay baraha uu Internet-ka ku leeyahay, sida Twitter-ka iyo Facebook.
Qodobka 60aad ee Dastuurka, gaar ahaan faqradiisa (C), ayaa cadeynaya in Xildhibaanada ay u yeeri karaan Ra’iisal Wasaaraha, Wasiirada, Gudiyada iyo Xafiisyada Madaxa-banaan si ay ula xisaabtamaan.
Waxa uu sidoo kale qodobkan siinayaa Baarlamaanka awood ay xsaanada uga qaadi karaan mas'uukasta oo diida u-yeeridda Xildhibaanada, taasina waxay hadda haysataa Wasiirka Xoosh, oo qodobkan jebiyay.
GAROWEONLINE
