Marxuum Wasiir Siraaji oo Muqdishu lagu aasay [Sawirro]
-
- Posted On 04-05-2017, 04:54PM
MUQDISHU, Somalia- ALLAHA u naxariistee waxaa galinkii dambe maanta magaalada Muqdishu lagu aasay Marxuum Wasiirkii Howlaha Guud iyo Dib u dhiska Somalia, Cabbaas Cabdullaahi Sheekh Siraaji oo xalay lagu dilay magaalaada Muqdishu.
Salaadda Janaasada ayaa Marxuumka loogu tukaday Masaajid ku yaalla Madaxtooyada, waxaana ka qayb galay Madaxweynaha Somalia iyo xubno katirsan golayaasha dowladda.
Aaska Marxuumka ayaa waxaa ka qeyg galay Ra’iisul Wasaaraha Soomaaliya Xasan Cali Khayre (Xasan Bile), Ra’iisul Wasaare ku xigeenka, Guddoomiye ku xigeenka Koowaad ee Baarlamaanka Federaalka Cabdiwali Sheekh Ibraahim Muudey, Wasiiro, Xildhibaano, Saraakiil Ciidan, Ehelada Marxuumka oo ka kala yimid gudaha dalka iyo dibbadiisa, iyo xubno kale.
Qaar kamid ah Madaxda dowladda Somalia, ayaa tacsi u diray Ehelkii iyo umadda Somaliyeed ee Marxuum Cabbaas uu ka tagay, waxayna codsadeen in cadaaladda la hor keeno dadkii ka dambeeyay dilka.
Waxay muujiyeen in arrintan tahay masiibo dhacday oo ay kawada xunyihiin.
Madaxweynaha Somalia, ayaa maanta dib ugu soo laabtay magaalada Muqdishu, kadib markii uu soo gaabiyay safar uu ku tagay Addis oo qaadan lahaa Saddex Cisho.
Waxaa socda baaritaano ku aadan qaabka dilku u dhacay, waxaana la xiray qaar kamid ah ilaada Hanti Dhowraha Qaranka.
GAROWEONLINE
