Mas'uul isku day khaarijin kaga badbaadey Muqdisho

MUQDISHO, Soomaaliya – Ugu yaraan hal askari ayaa ku dhintay tirro kalana way ku dhaawacmeen qarax miino oo Arbacada maanta ah ka dhacay degmadda Yaqshid ee gobolka Banaadir, sidda ay sheegeen saraakiil amni.

Qaraxa oo jugtiisa ay cusleyd waxaa lala beegsaday gaari uu la socday Guddoomiye ku-xigeenka arrimaha Bulshada Yaaqshiid, Cabdullaahi Shiilow.

Goobjoogeyaal khadka telefoonka ugu waramay warsidaha Garowe Online ayaa intaas ku daray in qaraxa uu ka dhacay nawaaxiga Hotel Guuleed.

Ma jirto koox illaa haatan dusha saaratay mas'uuliyadda falkaas. Balse, dhacdooyinka noocaan ah waxaa looga bartay ururka Al-Shabaab.

Waa qaraxii labaad oo noociisa ah oo Al-Shabaab ay ka fuliso Muqdisho isla maanta gudahiisa. Hal qof ayaa ku dhintay, saddex kalana way ku dhaawacmeen qarax ka dhacay xaafadda Qoob-dooro ee degmadda Kaaraan ee Muqdisho.

Weeraradaas oo loo adeegsaday miino ayaa lala beegsaday gaari ka shaqeynayey wacyi-gelinta safmareenka Coronavirus. Qofka dhintay wuxuu ahaa darawalka, halka saddexda dhaawacantay ay ahaayeen askartii ilaalineysay.

Shalay ayay ahayd markii Al-Shabaab ay weerar madaafiic loo adeegsaday ku qaadey xeradda Xalane gaar ahaan nawaaxiga garoonka Aadan Cadde. Hoobiyeyaasha waxay ku hab-sadeen qol dadka ay adeega ku sugaan.

GAROWE ONLINE