Maxkamadda Racfaanka Banaadir oo Sacdiya Bajaaj xorriyaddeeda dib ugu celisay

MUQDISHO, Soomaaliya — Sacdiya Macallin Cali, oo si weyn loogu yaqaan Sacdiya “Bajaaj”, ayaa maanta dib u heshay xorriyaddeeda, kaddib markii Maxkamadda Racfaanka Gobolka Banaadir ay burisay xukun saddex sano oo xabsi ah oo lagu riday dhammaadkii June.

Maxkamadda Racfaanka ayaa dhowaan dhageysatay racfaanka ay qareennadeedu ka qaateen xukunkii hore, waxaana maanta ay ku dhawaaqday inay baabi’isay xukunkaas, taas oo horseedday in Sacdiya si degdeg ah loo sii daayo.

Kiiska Sacdiya ayaa muddadii ay xirneyd dhaliyay hadal-heyn ballaaran oo gudaha Soomaaliya ah, iyadoo siyaasiyiin mucaarad ah iyo qeybaha bulshada rayidka ay si joogto ah u dalbanayeen in la sii daayo. Mucaaradka ayaa sidoo kale qabtay shirar jaraa’id iyo dibadbaxyo ay ku cambaareynayeen xabsigeeda.

Sacdiya oo ah hooyo carruur leh ayaa noqotay kiis si weyn loo hadal hayo, iyadoo taageerayaasheedu ay hay’adaha garsoorka ugu baaqayeen inay dib u eegaan xukunkii hore.

Go’aanka Maxkamadda Racfaanka ayaa ugu dambeyn meesha ka saaray xukunkii saddexda sano ahaa, waxaana Sacdiya ay xorriyaddeeda dib u heshay kaddib 122 maalmood oo xabsi ah.

GAROWE ONLINE