Mileeshiyo beeleed ku dagaallamay duleedka degmada Xarar-dheere

July 19, 2015 (GO)- Ugu yaraan labo qof ayaa ku geeriyoodey saddex kalena way ku dhaawacmeen dagaal beeleed shalay ila xalay saqdii-dhexe ka dhacay deegaano hoos taga demada Xarar-dheere ee gobolka Mudug.

Dagaalka ayaa u dhexeeya labo mileeshiyo beeleed oo deegaankaas wada dega, wuxuuna ka bilowday muran ku saabsan lahaanshaha ceel-biyood ku yaalla tuulada Xarar.

Odayaal iyo waxgarad kasoo kala jeeda labada dhinac ayaa saaka u baxay deegaannada lagu dagaallamay, si ay u kala dhex galaan labada mileeshiyo ee halkaas isku hor fadhida loogana gaashaanto in khasaare intaas ka badani dhaco.

Colaadaha ka dhasha daaqa iyo biyaha ayaa ah kuwo inta badan ka dhaca dalka Soomaaliya, gaar ahaan deegaannada ku fiican xoolo daaqsinka ee ay dadka reer-guuraaga ahi ku badan yihiin.

GAROWE ONLINE