Mowqifkii Guddoomiyaha gobolka Hiiraan oo is-badalay
-
- Posted On 18-10-2016, 11:15AM
BELEDWEYNE, Somalia- Gudoomiyaha gobolka Hiiraan Yuusuf Axmed Hagar (Dabageed), ayaa bedelay go'aankiisa ku aadan dhisamaha maamulka cusub Hir-Shabeelle ee lagu aas aasay magaalada Jowhar.
Yuusuf Dabageed ayaa sheegay inuu taageeray dhismaha Hir-Shabeelle, oo horey u diidanaa, wuxuuna tilmaamay in maamul aan ahayn kan xalay madaxdiisa la doortay uusan ka shaqeyn doonin gobolka uu gudoomiyaha ka yahay ee Hiiraan.
"Rabitaan Shacab ayaa lagu dhisay Hir-Shabeelle, waxaana ay u dhacday Doorashadiisa si xor iyo Cadaalad ah, marka waxaan leeyahay Bulshada iyo Odayaasha reer Hiiraan taageera Maamulkan," Ayuu yiri Yuusuf Dabageed.
Yuusuf Dabageed, ayaa markii hore la mowqif ahaa Odayaal dhaqan oo Beledweyne ku shirsan, kuwaasi oo doonayay inay maamul gaar ah dhistaan, kadib intuusan dhawaan tagin Muqdishu.
Hadalka Dabageed ayaa kusoo beegmaya, xilli inta badan Odayaasha Beelaha gobolka Hiiraan, ay kawada qeybgaleen Shirkii Jowhar, ee lagu dhisay maamulka Hir-Shabeelle.
Ugaas Xasan Ugaas Khaliif, oo ah Ugaas Beesha Xawaadle, ayaan wali bedelay Go'aankiisa uu ku diidan yahay dhisamaha Hir-Shabeelle, isagoo ku gacan sayray codsiyo kala duwan oo uga yimid IGAD iyo dowladda Somalia, kuwaasoo ahaa inuu ka mid noqdo dadka wax ka dhisaya maamulka Hir-Shabeelle.
GAROWEONLINE
