Mucaaradka Soomaaliya oo Difaacay Warqaddii Ay U Direen Beesha Caalamka ee La Xiriirtay Khilaafka Doorashooyinka

MUQDISHO – Xildhibaan Cabdiraxmaan Cabdishakuur Warsame oo ka tirsan Golaha Mustaqbalka Soomaaliya ayaa Axaddii sheegay in warqad ay dhowaan u direen beesha caalamka aan loogu talagelin in Soomaaliya dib loogu celiyo nidaam ku-meel-gaar ah, balse ay ahayd soo-jeedin siyaasadeed oo lagu xallinayo ismariwaaga doorashooyinka ka dhashay kaddib dhammaadka muddo-xileedka dowladda federaalka.

Cabdiraxmaan Cabdishakuur ayaa sheegay in soo-jeedintoodu ay ahayd in la dhiso gole ku-meel-gaar ah oo maamula arrimaha doorashooyinka iyo marxaladda kala-guurka haddii aan la helin xukuumad xil-gaarsiin ah.

“Farriintayadu waxay ahayd in dhibaatada Soomaaliya ay tahay mid siyaasadeed, xalkeeduna uu yahay siyaasad. Laguma xallin karo oo keliya ciidan iyo taageero dhaqaale,” ayuu yiri.

Xildhibaanka ayaa ku dooday in Dastuurka Ku-meel-gaarka ah ee Soomaaliya uu dhigayo in marka uu dhammaado muddo-xileedka dowladda ay sii shaqeyso oo keliya iyadoo ah xukuumad xil-gaarsiin ah, isagoo ku eedeeyay dowladda hadda jirta inay diiday inay qaadato doorkaas.

Sida uu sheegay, golaha ay soo-jeediyeen wuxuu qaban lahaa shaqooyinka laga filayo xukuumad xil-gaarsiin ah, sida kormeerka hannaanka doorashooyinka, fududeynta heshiisyada siyaasadeed iyo hubinta dhexdhexaadnimada hay’adaha amniga inta lagu jiro doorashada.

Cabdiraxmaan Cabdishakuur ayaa sidoo kale ka digay in dowlad sii joogta xafiiska iyadoo muddo-xileedkeedu dhammaaday, balse aan ahayn xukuumad xil-gaarsiin ah, ay wiiqeyso sharciyadda hay’adaha dowladda. Wuxuu xusay in beesha caalamku muhiimad gaar ah siiso jiritaanka dowlad loo arko mid sharciyad dastuuri ah leh marka ay timaaddo iskaashiga siyaasadeed, amniga iyo dhaqaalaha.

Ugu dambeyn, wuxuu ugu baaqay madaxda dowladda inay muujiyaan masuuliyad siyaasadeed kana fogaadaan waxa uu ku tilmaamay “siyaasadda qamaarka”, isagoo sheegay in Soomaaliya ay u baahan tahay wada-hadal iyo xal siyaasadeed oo dhab ah si looga gudbo ismariwaaga doorashooyinka.

Dowladda federaalka ayaan weli si rasmi ah uga hadlin hadallada ugu dambeeyay ee Cabdiraxmaan Cabdishakuur. Hadalladiisan ayaa imanaya iyadoo weli uu taagan yahay khilaafka u dhexeeya dowladda iyo mucaaradka ee ku saabsan hannaanka doorashooyinka iyo hirgelinta dastuurka, halka beesha caalamkuna ay marar badan ku baaqday in dhinacyada Soomaaliyeed gaaraan heshiis siyaasadeed oo loo dhan yahay.

GAROWE ONLINE