Mursal oo ka horyimid kala dirida Gudiga Maaliyadda, Digniin-na u diray Xukuumada

MUQDISHO, Soomaaliya - War qoraal ah oo kasoo baxay xafiiska Afhayeenka Gollaha Shacabka, Maxamed Mursal Cabdiraxmaan, ayaa wuxuu kaga hor-yimid kala diristii uu ku xigeenkiisa 1aad ku sameeyay Guddiga hoosaadka Maaliyadda.

Kala dirista Guddigaan oo xiisad xooggan ka dhex-abuurtay Aqalka Hoose ayaa timid markii uu warbixin soo saarey, taasi oo musuq-maasuq baahsan oo ka jira Wasaarada Maaliyadda iyo gobolka Banaadir.

Gudoomiyaha ayaa geesta kale, shaaciyay in warbixintii musuq-maasuqa soo bandhigtay lasoo marsiin doono habraaca saxda ah ee Golluhu leeyahay si loo horkeeno Gollaha, kadibna ay uga munaaqishoodaan.

Ugu dambeyntii, Afhayeenka Aqalka Wakiilada rayidka Baarlamaanka Soomaaliya ayaa ugu baaqay Laanta Fulinta/xukuumadda ee uu hogaamiyo Ra’iisul Wasaare Khayre inay ka dayso Gollaha faragelinta ay ku hayso.

“[Waa] in la dhowraa madax banaanida Gollaha Shacabka ee Baarlamaanka Soomaaliya oo ah Laanta Sharci deinta dalka,” ayaa lagu soo gabagabeeyay War-saxaafadeedka uu Mursal soo saarey.

Tani ayaa kusoo aadaysa xili maalmihii lasoo dhaafay uu Gudoomiyaha Gollaha Shacabka kulamo xasaasi ah uu la yeeshay Madaxda ugu sareysa dalka, gaar ahaan Madaxwayne Farmaajo iyo Ra’iisul Wasaare Khayre.

GAROWE ONLINE