NISA oo Khabiir Qaraxyada u qaabilsanaa Al-Shabaab Muqdisho ku qabtey
-
Wariyaha Muqdisho GAROWE ONLINE
- Posted On 28-09-2018, 04:42PM
MUQDISHO, Soomaaliya - Hay'adda Nabad Sugida iyo Sirdoonka Qaranka Soomaaliya ee [NISA], ayaa sheegtay inay qabatey hogaamiye Al Shabaab u qaabilsanaa sameynta qaraxyada, kadib howlgal ay ka fulisay Muqdisho.
"Howgal saacada qaatay oo si taxadar leh loosii qorsheeyay, kana dhacay agagaarka X-koontarool Mogadishu, ayaa lagu soo qabtay xubin AS oo ahaa Khabiir dhanka qaraxyada, habeynimada 27-ka Saptember," ayaa lagu yiri qoraalka NISA soo dhigtay Twitter-ka.
NISA wali ma aysan shaacin magaca ninka ay sheegtay inay soo qabatey, waxaana warkan uu qeyb ka yahay qoraallo mudooyinkii dambe hay'addan soo dhigeysay Twitter-ka, oo ay ku baahinaysay macluumaad ku saabsan xubno Al Shabaab oo ay qabatey.
Tan iyo markii uu Madaxweyne Farmaajo Fahad Yaasin u magacaabey taliye ku xigeenka NISA bishii August, hay'addan Sirdoonka qaabilsan ayaa waxay madaxa la gashay khilaafaad hogaankeeda sare u dhaxeeya, iyadoo xubno badan shaqada laga eryay.
In ka badan 200 oo kamid ahaa Askarta NISA ayaa la ruqseeyay bishan, kuwaasoo hadda soo wajahday khatar amni maadaama halkii gabaadka u ahayd laga soo saarey, iyagoo halis ugu jira inay Al Shabaab ku beegsato Muqdisho.
Fahad oo la sheegay inuu xiriir dhaw la leeyahay Sirdoonka Qadar, ayaa lagu eedeeyay inuu wato qorshe uu la damacsan yahay NISA, iyadoo dhawaan boqolaal Askari, hub iyo gaadiid dagaal oo hay'addu lahayd uu ku wareejiyay Booliska.
GAROWE ONLINE
