Qarax khasaaro sababay oo ka dhacay Jowhar
-
- Posted On 20-02-2017, 11:55AM
JOWHAR, Somalia - Qarax culus, oo khasaaro geestay ayaa xalay ka dhacay degmada Jowhar ee xarunta gobolka Shabeellaha dhexe.
Saraakiisha maamulka Jowhar, ayaa sheegay in Qaraxa uu ka dhashay Bam gacmeed lagu weeraray xarun ay ciidamada dowladda Somalia ku leeyihiin Xaafada Hanti-wadaag.
Inta la xaqiijiyay 2 ruux, oo shacab ah oo ku sugnaa guri ku dhaw Goobta qaraxa uu ka dhacay ayaa ku dhawacmay, waxaana la dhigay Isbitaalka degmada Jowhar.
Qaraxa kadib, ciidamada dowladda Somalia ayaa sameeyay howlgallo ballaaran oo ay ku fuliyeen xaafadda Hanti-wadaag, iyo qeybaha kale ee degmada, balse ma jirto cid ay usoo qabteen weerarka.
Ma jirto cid sheegatay Mas'uuliyada qaraxa magaalada Jowhar, ee xarunta maamulka Hir-Shabelle, laakiin weerarada Noocaan ah waxaa looga bartay Kooxda Al shabaab.
Dhanka kale, Madaxweynaha Hir-Shabelle oo dib ugu laabtay shalay magaalada ayaa sheegay in maalmaha soo socdo uu ku dhawaaqi doono golahiisa wasiirada cusub.
GAROWEONLINE
