Shabaab oo sheegatay dilka Askar katirsan AMISOM
-
- Posted On 05-11-2016, 01:29PM
MAHADAAY, Somalia- Al Shabaab ayaa sheegtay in 7 Askari oo katirsanaa ciidamada Burundi, ee qeybta ka ah AMISOM ku dileen weerar ka dhacay duleedka degmada Mahadaay, ee gobolka Shabeellaha dhexe.
Afhayeenka dhanka howlgallada Kooxda Al Shabaab Cabdicasiis Abu Muscab, ayaa xusay in weerarka uu ku billowday qarax wadada qarkeeda lagu aasay, kaasi oo lala eegtay Kolonyo katirsan ciidamadaas.
Wuxuu intaas ku daray in Al Shabaab ay weerareen Kolonyo military oo ay ka socdeen AMISOM, xilli ay kasoo baxeen Biya Cadde, kuna sii jeedeen deegaanka Jahweyn, oo qiyaastii 8Km u jira degmada Mahadaay.
Afhayeenka ayaa sidoo kale sheegay in Dagaal qaatey ku dhawaad Hal saac, uu ku dhaxeymaray goobta uu weerarka qaraxa ka dhacay Dagaalyahanadooda iyo ciidamada AMISOM.
AMISOM kama aysan hadlin Weerarka iyo sheegashada Al shabaab ee ah inay dileen 7 Askari oo u dhashay dalka Burundi, oo kamid ahaa howlgalka Midowga Africa ee Somalia.
Al Shabaab, ayaa howlgalkoodii u weecisay weeraro ku dhufo oo ka dhaqaaqa ah, waxaana warbixin ay soo saartay Qaramada Midoobay ay sheegtay inay halis ku tahay wali ammaanka Somalia.
GAROWEONLINE
