Sheekh Shariif iyo Xasan Sheekh oo shir gaar ah u tagay Cadale

Shariif Sheekh Axmed [midig] iyo Xasan Sheekh Maxamuud [bidix] ayaa shalay kulmay. [Screenshot Photo]

MUQDISHO, Soomaaliya - Madaxweyneyaashii 7aad iyo 8aad ee Soomaaliya, Shariif Sheekh Axmed iyo Xasan Sheekh Maxamuud, ayaa maanta gaarey degmadda taariikhiga ah ee Cadale ee gobolka Shabeellaha Dhexe.

Sida uu fahansan yahay warsidaha Garowe Online, labada musharax ee u taagan xilka ugu sareeya dalka coddeynta loo balansan yahay 10-ka October waxay ka qeybgalayaan shir halkaas ka qabsoomaya.

Wadaxaajoodyadaas oo qorshuhu yahay in ay socdaan muddo saddex casho ayaa u dhaxeeya siyaasiyiinta, odayaasha dhaqanka, wax-garadka, dhalinyaradda iyo aqoonyahanadda beesha Abgaal, Mudulood.

Ma cadda sababta dhabta ah ee waqtigan dalku u diyaar-garoobayo doorashooyinka heer federaal loogu soo beegay kulankan. Hase ahaatee, wuxuu kusoo aadayaa xilli 25-ka July ay bilaabaneyso xulista Aqalka Sare.

lllo wareedyo lagu kalsoon yahay ayaa intaas ku daraya in qaar kamid ah musharaxiinta kale ee u taagan xilka madaxtinimadda Soomaaliya ay wakiilo kaga qeybgalayaan wadahadalkan oo la abaabulayey maalmihii dambe.

Kahor socdaalkooda Cadale, Shariif iyo Xasan oo degaan doorashadoodu tahay HirShabelle ayaa Arbacadii shalay waxay Muqdisho kula shireen Xasan Cali Khayre, ra'iisul wasaarihii hore, oo qudhiisa musharaxiinta kamida.

Ololaha doorashadda Soomaaliya ee dib-u-dhac ballaaran uu ugu yimid qodobo caqabad noqdey awadeed ayaa u muuqanaya in durba uu bilowdey, iyaddoo doorashada Aqalka Sare ay caddeyn doonto cidda awooda leh.

GAROWE ONLINE