SOMALIA: Ahlu Sunna oo xirtay Radio Galgaduud
-
- Posted On 15-11-2016, 04:41PM
GURICEEL, Somalia- Ciidamo taabsan Ahlu Sunna ayaa xirtay Xalay Idaacad lagu magacaabo Radio Galgaduud oo ka howlgala magaalada Guriceel ee gobolka Galgaduud.
Mid kamid ah Shaqaalaha Radiyowgaas, ayaa GO u xaqiijiyay xiritaanka Idaacadda, oo uu sheegay in Xalay saacadu markii ay ahayd 10:25PM ay soo weerareen Malleeshiyada Ahlu Sunna Waljameeca katirsan.
Wuxuu sheegay in Idaacada Xarunteeda Guriceel la xiray, sidoo kalena laga qaatey FM-ta ay ku shaqeyso iyo qalab kale, isagoo intaasi ku daray inansan garan karin sababta ka dambaysa xiritaanka xaruntooda.
Maamulka Ahlu Sunna wali wax Fahfaahin ah kama uusan bixin sababta ay u xireen Radio Galgaduud, oo ah Idaacad xarumo ku leh Guriceel iyo Dhuusamareeb, lagana dhagaysto qeybo kamid ah Gobolkaasi.
Ahlu Sunna ayaa lagu eedeeyay inay caburiyaan Warbaahinta Madaxabanaan ee ka shaqaysa degmooyinka ay gacanta ku hayaan Gobolka Galgaduud ee bartamaha dalka Somalia.
GAROWEONLINE
