Somalia: Al Shabaab oo sheegatay Dilal ka dhacay Muqdishu
-
- Posted On 01-06-2017, 01:39PM
MUQDISHU, Somalia- Kooxda Al shabaab ee xiriirka la leh Al Qaacida, ayaa sheegatay Mas'uuliyadda Dilal Xalay ka dhacay magaalada Muqdishu.
Afhayeenka Kooxda Cabdicasiis Abu Muscab oo la hadlay warbaahinta Afka Al shabaab ku hadasha ayaa qiray inay iyagu ka dambeeyeen Dilka Sarkaal Militariga Somalia kamid ahaa iyo 2 Oday dhaqameed kuwaasoo lagu toogtay caasumadda waddanka.
Gaashaanle Sare Cabdullaahi Cilmi Nuur, oo ahaa Madaxii Gaadiidka Gurmadka Militariga ayaa waxay Rag ka tirsan Al shabaab ku khaarajiyeen xalay fiidkii Xaafadda Siliga Ameerikaanka ee degmada Wadajir.
Sidoo kale, Al shabaab ayaa dishay labo Oday dhaqameed oo Koonfur Galbeed kusoo doortay Xildhibaanada Baarlamaanka cusub, kuwaasi oo lagu magacaabi jiray Cabdisalaan Cabdullahi iyo Maxamed Abukar.
Dhammaan Kooxihii Dilalka gaystay ayaa baxsaday, mana jirto cid wali loo soo qabtey.
Dowladda Federaalka wali kama aysan hadlin Dilalka ka dhacay 24-kii saac ee lasoo dhaafay ee Muqdishu ka dhacay, kuwaasi oo qeyb ka ah Dilalka lagu bartilmaameedsanayo mas'uuliyiinta iyo Odayaasha Soomaaliyeed.
GAROWEONLINE
