Somalia: Duqayn ka dhacday Gobolka Gedo
-
- Posted On 25-04-2017, 12:24PM
CEEL CADDE, Somalia - Diyaaradaha dagaalka Militariga Kenya ayaa xalay duqeyn cirka ah ka fuliyay saldhigyo Al Shabaab ku leeyihiin gobolka Gedo, sida dadka deegaanku u xaqiijiyeen GO.
Duqeynta ayaa ka dhacday deegaanka War-gaduud, oo qiyaastii 40KM dhanka galbeed uga beegan degmada Ceel Cadde, halkaas oo kooxdaasi ka abaabusho weerarrada ka dhaca Gedo.
Qof kamid ah dadka deegaanka ayaa Warsidaha GO u sheegay in diyaaradaha Kenya ay fuliyeen weerarka, islamarkaana lala bartilmaameedsaday fariiso ay leeyihiin dagallamayaasha Shabaab.
Al shabaab ayaa hubka lidka diyaaradaha ku riday diyaaradaha Kenya ee soo weeraray deegaanka, mana la oga khasaaraha ka dhashay isku dhacay labada dhinac.
Dadka deegaanka ayaa loo diiday inay tagaan goobta weerarku ka dhacay.
Wararka aan ka helayno gobolka Gedo, ayaa sheegaya in wali dhowr diyaaradaha qumaatiga u kaca (Helicopters) ee ciidamada KDF dul-heehaabayeen saaka hawada deegaanada ku dhaw Ceel Cadde.
Al Shabaab wali kama aysan hadlin weerarka iyo khasaaraha ka dhashay.
Ciidamada cirka Kenya ayaa maalmo kahor duqeeyay nawaaxiga Ceel Cadde, kaasi oo Wasaaradda difaaca dalkaasi ay sheegtay in lagu dilay 153 katirsan dagaalyahannada Shabaab.
GAROWEONLINE
