Somalia: Madaxweyne Farmaajo oo u dhoofay London
-
- Posted On 09-05-2017, 11:55AM
MUQDISHU, Somalia - Madaxweynaha Somalia Maxamed Cabdullaahi Farmaajo, iyo wafdi uu hogaaminayo ayaa maanta uu dhoofay magaalada London, oo maalinta Khamiista ah uu ka furmayo Shir looga hadlayo arrimaha Somalia.
Madaxweyne Farmaajo oo ay ku wehliyaan safarkiisa hogaamiyaasha HirShabelle, Galmudug iyo Koonfur Galbeed ayaa saaka ka duulay Garoonka Diyaaradaha Muqdishu, iyagoo kusii jeeda dalka Ingiriiska.
Madaxweynayaasha Jubbaland iyo Puntland Axmed Madoobe iyo Cabdiweli Gaas oo ku sugan Nairobi ayaa la filayaa inay halkaasi kasii raacaan wafdiga Madaxweyne Farmaajo, ee ka ambabaxay Muqdishu.
Shirka London oo ay ka qeybgalayaan in ka badan 40 dowladood, Hay'addo caalami ah oo QM ay kamid tahay ayaa waxaa shir gudoomin doono Ra'iisal Wasaaraha UK Theresa May iyo Farmaajo.
Mudo labo maalmood ah ayuu socon doonaa Shirka London, waxaana diirada lagu saari doonaa waxyaabo ay kamid yihiin amniga, dib u dhiska dalka iyo wax ka qabashada macluusha ka jira Somalia.
GAROWEONLINE
