Somalia: Nabadoono lagu gowracay gobolka Baay
-
- Posted On 05-09-2016, 11:37AM
BARDAALE, Somalia- Kooxda Al Shabaab ayaa labo Nabadoon oo caan ahaa ku gowracday deegaan ku dhaw degmada Bardaale, ee gobolka Baay.
Taliyaha ciidamada booliska degmada Bardaale Maxamed Isaaq, ayaa GO u xaqiijiyay in Al Shabaab dhawaan labo Nabadoon ka afduubteen degmada, kadibna ay Axaddii shalay la bireeyay.
Dilka Nabadoonad waxa uu ka dhacay deegaanka Tuurabuureey oo ku dhawaad 20KM dhinaca Galbeed kaga beegan degmada Bardaale ee gobolka Baay, oo ay maamusho xarakada Al Shabaab.
Meydadka Labada Oday oo Madaxa ka go'an ayaa Saakay lagu arkay duleedka degmada Bardaale, oo Al shabaab soo dhigtay kadib markii ay dileen Shalay.
Wararka GO heshay ayaa sheegaya in sababta mallayshiyaadkan u dileen Odiyaasha tahay inay xiriir dhaw oo wadashaqeyn ah la lahaayeen maamulka degmada Bardaale, ee Koonfur Galbeed Somalia.
Ururkan dagaalka kula jira dowladda Somalia iyo AMISOM ayaa inta badan Koonfurta Somalia ku dila duubabka kasoo horjeesta awaamiirtooda, gaar ahaan bixinta xoolo ay ugu yeeraan Zakawaat iyo kuwa ay uga shakiyaan inay la shaqeeyaan maamulada dowladda Somalia.
GAROWEONLINE
