Somalia: Saraakiil katirsan Al Shabaab oo lagu qabtay Qoryooley
-
- Posted On 11-04-2017, 03:40PM
QORYOLEY, Somalia- Ciidamada ammaanka gobolka Shabeellaha hoose, ayaa sheegay inay maanta gacanta ku dhigeen xubno katirsan kooxda Al shabaab, oo ay ku jiraan hogaamiyaal sar sare.
Cabdi Axmed Cali oo ah ku xigeenka Gudoomiyaha maamulka Qoryooley ayaa u sheegay GO in xubnaha ay qabteen uu kamid yahay Madaxii howlgalka Al-shabaab ugu qaabilsanaa degmadaas.
Cabdi ayaa tilmaamay in raggan katirsan Al shabaab lagu soo xiray howlgal ciidamada dowladda Somalia ka fuliyeen deegaanka Farxaane, oo 5KM Koonfur uga beegan Qoryooley.
Wuxuu xusay inay hadda raggaasi su’aalo ku weydiinayaan saldhigga Booliska degmada, islamarkaana ay qorsheynayaan inay kusoo wareejiyaan Maxkamadda Ciidamada qalabka sida ee Somalia.
Ragga la qabtay, waxaa sidoo kale ku jira labo ruux oo la sheegay inay wardiye u ahaayeen saraakiisha gacanta lagu dhigay.
Al shabaab kama aysan hadlin xubnaha la sheegay in lagu qabtay hogal ka dhacay duleedka Qoryooley ee gobolka Shabeellaha hoose.
GAROWEONLINE
