Somalia: Wafdi uu hoogaaminayo Odowaa oo Cadaado tagay
-
- Posted On 22-09-2016, 07:29PM
CADAADO, Somalia- Wafdi uu hogaaminayo wasiirka Arrimaha Gudaha xukuumadda waqtigeedu dhammadaay ee dowladda Federalka Somalia, ayaa maanta tagay magaalada Cadaado xarunta KMG ah ee Galmudug.
Socdaalka Odowaa iyo wafdiga lasocda ayaa la sheegay inay salka ku hayso dar-dar galinta howlaha doorashooyinka dhacaya 2016.
Waxaa soo dhaweyn u sameeyay madax katirsan Galmudug iyo qaybo kamid ah bulshada ku dhaqan Cadaado.
Kulamo kala duwan ayay la qaateen bulshada halkaasi ku dhaqan iyagoo kala hadlay arrimo khuseeya doorashada dhacaysa dabayaaqada sannadkan.
Waxaa lagu wadaa inay la kulmaan madaxda maamulkaasi.
Wasiir Cabdiraxmaan Maxamed Xuseen Odawaa, oo warbaahinta la hadlay, ayaa sheegay in doorashada sanadkan dalka ka dhacaysa tahay mid fursad wayn siinaysa shacabka, sidaa daraadeedna loo baahanyahay in ahmiyadeeda lagu baraarugsanaado.
Waxa uu intaa ku daray wasiir Odawaa, in maalmaha soo socda wafdigu joogi doono magaalada Cadaado, islamarkaana kulamo la qaadan doonaan Odayaasha dhaqanka si loo dardargaliyo arrimaha doorashooyinka oo dawlada Soomaaliya ay xoogga saarayso inay si hufan u dhacdo.
Socdaalkan ayaa qayb ka ahay safarro is-daba joog ah oo madaxda dowladda waqtigeedu dhammaday ku tagayeen degmada Cadaado ee gobolka Galgaduud.
GAROWEONLINE
