Theresa May oo furtay Shirka London iyo Farmaajo oo codsaday in la qaado Xayiraadda Hubka
-
- Posted On 11-05-2017, 02:35PM
LONDON, UK - Ra'iisal wasaaraha Ingiriiska Theresa May ayaa si rasmi ah u furtay Shirka London, ee looga hadlayo arrimaha Somalia, kaasi oo ay ka qeybgalayaan dowladdo badan iyo Hay'ado caalami ah.
Theresa May ayaa sheegtay inay ku faraxsan tahay inay dowladeeda martigeliso Shirka London ee Somalia, waxayna taageero u muujisay dowladda cusub ee Madaxweyne Maxamed Cabdulahi Farmaajo.
Shirka waxaa ka hadlay hogaamiyaal dhowr ah, oo ay kamid yihiin Madaxwenayaasha Kenya, Uganda, iyo Ra'iisal wasaaraha Ethiopia, oo dhamaantooda khudbadahooda diirada ku saarey amniga Somalia iyo Dagaalka lagula jiro Al shabaab.
Madaxweyne Farmaajo wuxuu ka sheegay Shirka in dowladiisa ay wax ka qaban doonto amniga iyo musuq-maasuqa, sidoo kalena ay abuuri doonto fursado caalamka uu ku maal-gashan karo Somalia.
Wuxuu codsaday Madaxweynaha in Somalia laga qaado xayiraadda hubka ee uu kusoo rogay Gollaha Amniga, si dowladiisa ay usoo iibsato hub ay ciidamadeeda kula dagaalamaan Kooxda Al shabaab.
Farmaajo ayaa ku celiyay balan-qaadkiisa ahaa in Al Shabaab awoodeeda kusoo wiiqi doono labo sano.
Shirka London, oo ah kii saddexaad oo Somalia loo qabto tan iyo 2012 ayaa diirada lagu saaray Amniga iyo Arrimaha Bini'aadanimada, iyadoo lagu baabay in deymaha dhaqaale laga cafiyo dalka.
GAROWEONLINE
