Turkiga oo saldhiga dayax-gacmeed ka hirgelinaya Soomaaliya

ANKARA, Turkey - Turkida ayaa wadahadalo kula jira seddex wadan iyagoo doonaya inay ka caawiyaan horumarinta saldhigyadda hawada sare ee Soomaaliya iyo kuwa ay kusoo degaan dayaxa gacameedyadda, sida uu sheegay madaxa wakaaladda hawada sare dowladda uu hogaamiyo madaxwayne Recep Tayib Erdogan.

Serdar Huseyin Yildirim, madaxa Wakaaladda Hawada ee Turkiga, ayaa hadaladdan u sheegay wakaaladda wararka Sputnik isagoo ka qeyb galaya Shirka Baadhista Hawada Caalamka, oo lagu qabtay St Petersburg intii u dhaxeysay 14 iyo 18-kii Juun.

In kasta oo uusan sheegin waddammada ku lugta leh, hadalladiisa waxay soo jeediyeen in Ruushka uu ka mid yahay. "Waxaan kala shaqeyn karnaa Ruushka meelo badan, xawaaraha, matoorada gantaalada. Waxaan ka wada hadalnay suurtagalnimada in Ruushku uu gacan ka geysto dhismaha. Waxay khibrad weyn ku leeyihiin aaggan, labadaba suumanka wax lagu rito iyo meelaha laftooda," ayuu yiri Yildirim.

Waxaa la soo sheegay bishii Febraayo in Ankara ay ka fikireyso dhisida saldhig weyn ee Soomaaliya taasoo qayb ka ah qorshe $ 1 bilyan doolar ah oo lagu horumarinayo barnaamijka sahaminta hawada.

Sida laga soo xigtay Recep Tayyip Erdogan, madaxweynaha Turkiga, tan waxaa loogu talagalay in lagu fuliyo "qorshaha adag" degitaanka Dayaxa sanadka 2023, oo ah boqol-jirsha aasaaskii Turkiga casriga ah.

Hawlgalkani wuxuu u oggolaanayaa saynisyahannada Turkiga inay khibrad u yeeshaan helitaanka hamigooda ee 2028 oo ay ku xigto fulinta tijaabooyin cilmiyaysan iyo geynta gaari sahamin.

Yildirim wuxuu intaa ku daray in Turkiga ay wada hadal la yeesheen Xarunta Hawlgalka Kaabayaasha Dhulka, oo hoostagta wakaaladda hawada Ruushka ee Roscosmos Hirgelinta qorshahan faahfaahsan ayaa laga yaabaa inay bilaabato sanadka soo socda, marka la dhameystiro goobta ay ku taal aagga loo yaqaan 'spaceport'.

Turkiga ayaa aas-aasay hay'addiisa hawada sare bishii Diseembar 2018. Sannadkii 2020, waxay ku dhawaaqday tijaabinta gantaal uu soo saaray qandaraaslaha difaaca ee Roketsan.

Waxa kale oo ay qorshaynaysaa inay u dirto cirbixiyeen Turki ah Saldhigga Caalamiga ah ee Cirka, oo ay bilawdo dayax gacmeedyo si ay u dejiso nidaamkeeda u gaarka ah ee meelaynta adduunka.

Yildirim oo wareysi siiyay Sputnik sanadkii hore wuxuu tilmaamay in wakaaladda hawada sare ee dalka ay ka shaqeyneyso ku dhowaad 30 mashruuc oo kala duwan, ayna wadahadalo la yeelatay ilaa 20 dal oo ku saabsan iskaashiga hawada sare, oo ay ku jiraan Ukraine, Kazakhstan, Russia, Japan, China, Pakistan, Hindiya iyo Azerbaijan.

GAROWE ONLINE