Villa Soomaaliya oo muddeysay shirka Farmaajo, Deni iyo Axmed Madoobe
-
WARIYAHA MUQDISHO GAROWE ONLINE
- Posted On 02-09-2020, 02:30PM
MUQDISHO, Soomaaliya – Madaxtooyadda Soomaaliya ayaa sheegtay in uu caawa si ramsi ah u bilaaban doono wadahadalada arrimaha doorashooyinka ee u dhaxeeya Farmaajo, Deni iyo Axmed Madoobe.
Cabdinuur Maxamed Axmed, afhayeenka Villa Soomaaliya oo shaaciyey arrintaan, ayaanan ka dhawaajin meesha shirku ka dhacayo.
"Madaxweyne JFS Mudane Maxamed Cabdullaahi Farmaajo ayaa caawa si rasmi ah u furaya wadahadallada arrimaha doorashooyinka ee u dhaxeeya DFS iyo Dowlad Goboleedyada Puntland & Jubaland," ayuu kusoo qoray Facebook.
Wuxuu raaciyey: "Xalay ayay madaxdu ku yeelatay Villa Soomaaliya kulan casho sharaf iyo soo dhaweyn ah oo horudhac u ah kan caawa loo ballansan yahay".
"Waxaan rajaynaynaa in ay kasoo baxdo natiijo wanaagsan oo ay saldhig u tahay in ay dalka ka qabsoonto doorasho waqtigeeda ku dhacdo Insha Allaah," ayuu kusoo gabagabeeyay hadalkiisa.
Deni iyo Axmed Madoobe ayaa shalay soo gaarey Muqdisho, waxaana ay kulamo horudhac ah la qaateen wakiiladda Beesha Caalamka.
Shirka Muqdisho ayaa ah mid si weyn isha loogu hayo, waxaana la filayaa in heshiis mideysan looga gaaro nooca doorashooyinka Soomaaliya ee 2020-21 kuwaasoo aanan wali lagu heshiis nooca lagu galayo.
GAROWE ONLINE
