Wada-hadallada Galmudug iyo Ahlu Sunna oo Muqdishu ka furmaya
-
- Posted On 18-04-2017, 12:22PM
MUQDISHU, Somalia- Waxaa Maanta oo Talaado ah la filayaa in magaalada Muqdishu uu ka furmo Wada-hadallada u dhaxeeya Galmudug iyo Ahlu Sunna, kaasi oo garwadeen ka tahay dowladda Federaalka Somalia.
Shirkan oo ay ka qeyb-galaya Wasiirrada Arrimaha Gudaha Cabdi Faarax Saciid Juxa iyo Dibadda Yuusuf Garaad Cumar, oo xalay Ra'iisal wasaare Kheyre u magacaabay inay dhex-dhexaadiyaan labada dhinac.
Waxaa ku sugan Muqdishu wafuud ka kala socoto Galmudug iyo Ahlu Sunna, oo ka qeyb-galayo Shirka mideynta maamullada iska soo horjeeda ee ku kala sugan magaalooyinka Cadaado iyo Dhuusaareeb.
Dowladda dhexe ayaa ku dadaalaysa inay ka miro dhaliso wada-hadalkan ka hor doorashada la filayo inay Galmudug ka dhacdo 30 bishan.
Labada dhinac ayaa horay u sheegay inay diyaar u yihiin wada-xaajood iyo inay miiska dushiisa ku xalliyaan wixii kala aragti duwanaan ah.
GAROWEONLINE
