Wadahadalada doorashooyinka oo ka bilowday Muqdisho
-
WARIYAHA MUQDISHO GAROWE ONLINE
- Posted On 21-08-2021, 09:18AM
MUQDISHO, Soomaaliya - Shirka Golaha Wadatashiga Qaranka ayaa ka furmay Muqdisho gaar ahaan Teendhada Afasiyooni oo ah xarunta ciidamadda cirka Soomaaliyeed ee magaala madaxda.
Madaxwayneyaasha shanta maamul goboleed ee waddanka iyo guddoomiyaha gobolka Banaadir ahna duqa Muqdisho, Cumar Maxamuud Maxamed [Filish] ayaa kasoo muuqdey wadahadaladda.
Ra'iisul wasaaraha xilgaarsiinta Maxamed Xuseen Rooble ayaa guddoominaya wadaxaajoodyadan oo kalkii hore qorshuhu ahaa in ay ka bilowdaan caasimadda Khamiista todobaadkii lasoo dhaafay.
Sida laga soo xigtay qoraal kasoo baxay xukuumadda xilgaarsiinta, wadahadaladan ayaa diiradda waxaa lagu saarayaa sidii loo dardargelin lahaa howlaha ka haray doorashooyinka dalka uu galay.
Bayaanka ayaa lagu caddeeyay in ajandaha ay qeyb ka tahay "diyaarinta habraacyada doorashada Golaha Shacabka, raadinta dhaqaalaha ku baxaya doorashooyinka ee aan weli soo xeroonin iyo sidii horey loogu wadi lahaa doorashooyinka dalka ka bilowday".
Garowe Online ayaa fahansan in suurtagal ay tahay in madaxda isbedel ku sameeyaan heshiiskii 17-kii September, 2021 gaar ahaan degaan doorashadda iyo tiradda dooraneysa Xildhibaanadda.
Kulankan ayaa qeyb ka ah wadahadalo taxano ah oo bilooyinkii u dambeeyay ay madaxda Soomaalida ka yeesheen coddeynta heer federaal oo qorshuhu ahaa in ay dalka ka dhacdo sanadka 2020-21.
GAROWE ONLINE
