Waddooyinka Magaalada Muqdishu oo loo xirayo Caleemo-saarka Madaxweynaha
-
- Posted On 21-02-2017, 01:09PM
MUQDISHU, Somalia- Maamulka gobolka Banaadir ayaa sheegay in waddooyinka Muqdishu loo xirayo caleema-saarka Madaxweyne Maxa'ed Cabdullaahi Farmaajo, oo lagu wado inay dhacdo Maalinta Berri ah.
Ismaaciil Cabdi Guure, oo ah ku-xigeenka Gudoomiyaha gobolka Banaadir ayaa shaaciyay go'aanka lagu xirayo waddooyinka caasumadda, isagoo xusay in amarkaasi uu dhaqan-galayo maanta oo Talaado ah.
Wasaaradda duulista hawada xukuumadii uu waqtigeedu dhammaaday ayaa sheegay Todobaadkii tagey in la hakin doono maalinta Arbacada ah, dhammaan duulimaadka Garoonka Diyaaradaha Muqdishu.
Xafladda Caleema-saarka Mr Farmaajo ayaa la filayaa in ay kasoo qaybgalaan Madax sare, oo ka socoto caalamka iyoo Geeska Africa, kuwaasi oo ay kamid yihiin Madaxweynayaasha Kenya iyo Jabuuti.
Si kastaba, dadka shacabka ah ayaa aad uga walaacsan xirnaanshaha waddooyinka, oo saamayn ku yeelan doonto Waxbarashada, Ganacsiga iyo isku-socodkooda.
Madaxweyne Farmaajo ayaa lagu wadaa in lagu caleema-saaro Hoolkii lagu doortay ee xarunta Ciidanka Cirka ee Afisyooni February 8-dii, waxaana la filayaa inay munaasabada billaabato 11:00 am xilliga geeska Africa maalinta Arbacada ee 22 bishan.
GAROWEONLINE
