Wariye ku dhintey qaraxa Jazeera, Madaxweynaha DF oo ka hadley
-
- Posted On 26-07-2015, 08:40PM
July 26,2015 (GO)- Wariye ka tirsan Universal TV ayaa ku geeriyooday qaraxii ka dhacay Hotel Jaziira ee magaalada Muqdisho.
Cabdicasiis Ibraahim Okey oo tirsan Universaltv ayaa Radio Garowe u xaqiijiyay dhimashada Cabdikariin Macallin Aadan oo TV-ga uga soo warami jiray gobolka Gedo. Qaraxaan ayaa sidoo kale waxaa ku dhaawacmay wariye Salmaan Jamaal Siciid oo ka tiraan Universal TV.
Dhinaca kale madaxweynaha dowlada Federaalka ayaa tacsi u direy dadkii ku dhintey qaraxaan isaga oo sheegey inuu ahaa fal fuleymo ah oo ay gaysteen kooxaha argagixisada ah.
“Waxan u tacsiyeynayaa dhamaan dadkii wax ku noqdey falkan argagixisnimo waxaana caafimaad degdeg ah u rajeynayaa dadkii ku dhawacmey weerarkaasi waxashnimada oo aan wax shuqul ah ku lahayn diinteena saliimka ah, waan hubaa inaan argagixisada ka adkaaneyno, marnababa ma dhacayso inay shacabka ka dhigtaan la-haysteyaal”, ayuu yiri Madaxweynaha dowlada Federaalka oo ku sugan magaalada Kismayo
Dhimashada weerarka maanta loo gaystey hotelka Jazeera ayaa wararku sheegayaan iney gaartey labaatan qof halka dhaawac farabadan uu jiro.
GAROWEONLINE
