Wasaaradda Amniga Gudaha Somalia oo ka hadashay qarax ka dhacay Muqdishu
-
- Posted On 24-10-2016, 02:58PM
MUQDISHU, Somalia- Afhayeenka Wasaarada Amniga Gudaha Somalia Cabdikaamil Maclin Shukri, ayaa sheegay in 4 qof ay ku dhimatay, 7 kalena ay ku dhaawacmeen Qarax loo adeegsaday Gaari oo Xalay ka dhacay magaalada Muqdishu.
Gaari lagu soo xiray walxaha qarxa oo lala damacsanaa Kolonyo ciidamada dowladda Somalia, ayaa ku qarxay meel ku dhaw halka loo yaqaano Daljirka Dahsoon, ee degmada Boondheere.
Cabdikaamil, ayaa tilmaamay in ciidamada markii ay ka shakiyeen Gaari oo xowli ku socdey ay ku rideen Xabad, kadibna sidaasi uu ugu qarxay goob ay ku sugnaayeen dad shacab ah.
Dadka ku dhintay Qaraxa ayaa dhamaantooda waxay ahaayeen saddex Shicib ah iyo Ninka watay Gaariga miinada lagu soo xiray, sida uu xaqiijiyay Afhayeenka Wasaarada Amniga Somalia.
Al Shabaab ayaa sheegtay Mas'uuliyada weerarkaas.
Amniga Muqdishu ayaa u muuqda inuu faraha ka baxaya, sidoo kalena uu fashilmay balanqaadkii dowladda uu waqtigeedu dhammaaday ee ahaa inay sugayso Ammaanka Caasimadda xilliga Doorashada.
GAROWEONLINE
