Weerar lagu qaaday Saldhig ku yaal Lego, nabadoon la dilay
-
- Posted On 24-11-2016, 12:45PM
LEEGO, Somalia- Koxda Al Shabaab ayaa Hoobiyaal ku weerartay Xalay Saldhiga ciidamada AMISOM ay ku leeyihiin deegaanka Leego ee gobolka Shabeellaha Hoose.
Wararka ayaa sheegaya in ku dhawaad 10 Hoobiye lagu tuurey Saldhiga AMISOM ee Leego, kuwaasi oo geestay khasaarooyin isagu jiro dhimasho iyo dhaawac, inkastoo aan la ogayn tirada Khasaaraha.
AMISOM kama aysan hadlin Weerarka Al Shabaab ay sheegeen inay ku qaadeen Salhigooda Leego, kaasi oo ay deganyihiin ciidamada Burundi.
Bishii June, 2015, ayaa kooxda Al Shabaab weerar ku qaaday, kaasi oo lagu dilay Askar badan oo u dhashay Burundi.
Dhanka kale, Nabadoon caan ah ayaa lagu dilay Tuulada Buulo-Cadeey, oo ku taallo Duleedka Deegaanka Lambar-konton, ee gobolka Shabeellaha hoose waxaana dilkiisa geestay Koox hubaysan oo aan heebtooda wali la garan.
Nabadoonka oo lagu magacaabi jiray Nuur Xuseen Abuukar ayaa lagu dhex-dilay beertiisa, iyadoo kuwa dilayna ay goobta isaga baxsadeen, sida dadka deegaanka ay u xaqiijiyeen Warsidaha Garowe Online.
Gobolka Shabeellaha Hoose ayaa waxaa ka taagan dagaallo beeleed mudo sanado ah taaganaa, kaasi oo ku salaysan maamulka Gobolkaasi, waxaana dilalka inta badan ka dhaca ay ku salaysan yihiin Aanooyin qabiil.
GAROWEONLINE
