Xaaska hogaamiyaha Daacish-ta Somalia oo dalbaneysa magdhow [Sababta]
-
Wariyaha Muqdisho GAROWE ONLINE
- Posted On 05-02-2019, 10:37AM
MUQDISHO, Somalia - Xaaska hogaamiyaha Daacishta Soomaaliya ayaa ku eedeysay sirdoonka dalka Ingiriiska inay u geysteen jirdil.
Eedaymaha Muna Cabdalla ayaa ku khasbi kara xukuumada London inay bixiso aduun dhan hal milyan oo Yuuroo, waa hadii ay maxkamad caddeyso eedeymahaan.
Haweeneydaan oo ah Soomaali-British ayaa ka tabaneysa; in la jeebeeyay, birar lagu garaacay, lana baah-dilay kahor inta aan la su’aalo la waydiin.
Dhibaatadaan ayay tibaaxday in loo geystay sanadkii 2013-kii, markaasi oo lagu xiray garoonka diyaardaha magaalada Boosaao xili ay booqatay seygeeda Cabdiqaadir Muumin.
"Afka ayaa laga rixay, taasi oo dhibaato ku noqotay inay neef-sato. Waxaa loogu hanjabay in la dilayo…Waa la argagax-geliyay, hurdada ayaa loo diiday," sidaasi waxaa lagu sheegay qoraal kasoo baxay maxkamada.
Dukmiintiyada ayaa intaas ku daraya in haweeneyda ay su’aaleen labo qof, oo u kala dhashay dalalka Mareykanka iyo Britain.
Wargeyska Daily Mirror ayaa daabacay in maxkamada sare ee Ingiriiska ay u ogolaatay dowlada in qayb kamid ah dhageysiga dacwadahaan gaar ahaan meelaha xasaasiga ah ay u dhacdo si qarsoodi ah.
Muna ayaa ku nool magaalada Berkshire ee UK balse seygeeda, oo qaatay dhalashada Sweden ayaa laga mamnuucay Ingiriiska 2010-kii inuu taageero ururka Al-Shabaab.
Muumin, oo tan iyo 2015-kii madax u ahaa Daacishta Soomaaliya, ayaa lala xiriirinayaa Jihadi John, kaasi oo u dhashay UK, laguna dilay duqayn dalka Suuriya sanadkaaasi.
Qareenka Muna Cabdalle, kaasi oo lagu magacabo Shubhaa Srinivasan ayaa rumeysan inay hayaan caddeymo ku aadan gal-dacwadeed. Balse, wasaarada arrimaha dibada wali kama aysan hadlin.
Dowlada Ingiriiska ayaa dhowr jeer lagu eedeeyay inay ku jirdil-dishay muwaadiniin dhowr ah dalal kala duwan, iyada oo in ka badan 20 milyan oo Yuuroo siisay wax ka badan 20 dhibanayaal.
GAROWE ONLINE
