Xasan Sheekh oo isku keenay xulafadiisa Baydhabo xilli loolan adag loogu jiro hoggaanka Koonfur Galbeed

BAYDHABO - Madaxweynaha Soomaaliya Xasan Sheekh Maxamuud ayaa magaalada Baydhabo ku guuleystay inuu isku keeno xubnaha ugu muhiimsan xulafadiisa siyaasadeed, xilli uu bilowday tartan adag oo loogu jiro hoggaanka cusub ee maamulka Koonfur Galbeed.

Socdaalka madaxweynaha oo qaatay dhowr maalmood ayaa yimid ka dib markii dowladda federaalku ay si buuxda ula wareegtay gacan ku haynta magaalada, taas oo horseedday iscasilaaddii madaxweynihii hore ee KG Cabdicasiis Laftagareen.

Xubnaha ugu tunka weyn ee hadda loolanka ugu jira xilka madaxweynaha Koonfur Galbeed ayaa dhammaantood ah xulafo dhow la ah madaxweyne Xasan Sheekh, waxaana ka mid ah Guddoomiyaha Golaha Shacabka Sheekh Aadan Madoobe, Wasiirka Dekedaha Cabdulqaadir Maxamed Nuur, iyo Wasiirka Xannaanada Xoolaha Xasan Eelaay.

Madaxweynaha ayaa dadaal ugu jira inuu isku dubarido tartankan si uusan u dhalin kala qeybsanaan daciifisa saameynta dowladda federaalka ee gobolka xasaasiga ah.

Dadaalladan isku xirka ah ayaa lagu soo beegay xilli la shaaciyay in doorasho qof iyo cod ah ay magaalada ka dhici doonto 28-ka April. Madaxweyne Xasan Sheekh ayaa rumeysan in midnimada xulafadiisa ay muhiim u tahay xaqiijinta xasilloonida Baydhabo iyo guusha qorshaha dowladda ee ah in nidaamka doorashooyinka tooska ah laga bilaabo deegaannada Koonfur Galbeed.

GAROWE ONLINE